Lightning Network Bitcoin blokçeyni üzərində yerləşən və bütün kriptovalyutalara tətbiq oluna bilən bir ödəniş protokoludur. Bu protokol zamanla şəbəkədəki yüklənməni azaltmaq və əməliyyatların keyfiyyətini artırmaq üçün hazırlanıb. Bir növ, artan əməliyyat sayının yaratdığı sıxlığı minimuma endirmək məqsədilə zəncirdənkənar (off-chain) görülən işin məhsuludur. Bunun sayəsində köçürmələr sürətlə həyata keçirilir və mikroəməliyyatlar rahatlıqla aparılır.
Blokçeyn şəbəkəsindən kənarda yol yaradılmaqla aparılan bu köçürmə prosesi nəticəsində əməliyyatlar mayner təsdiqindən keçmir. Mayner təsdiqinə düşməyən əməliyyatlardan isə heç bir komissiya tutulmur. Beləliklə, mikroəməliyyatlar asanlıqla icra edilir; açılmış kanal daxilində aparılan bu əməliyyatlar tamamlandıqdan sonra blokçeynə yazılır.
Bir-biri ilə kanal açmaq istəməyən istifadəçilər başqa şəxslərin qurduğu kanallardan istifadə edərək köçürmə edə bilərlər. Lightning Network vasitəsilə aparılan əməliyyatlarda hər iki tərəfin onlayn olması tələb olunur. Tərəflərdən biri oflayndırsa, blokçeyn üzərində baş verən köçürmələrdən fərqli olaraq əməliyyat baş tutmayacaq. Köçürmələr başa çatdıqdan sonra kanal bağlanır və əməliyyatlar eyni qaydada blokçeyndə qeydə alınır. Bu baxımdan, kanal açıq qaldığı və tərəflər onlayn olduğu müddətdə limitsiz sayda əməliyyat aparmaq mümkündür; kanal bağlandıqdan sonra isə əməliyyat xülasələri imzalanaraq blokçeyndə dərc olunur.
Geniş yayılmış fikrə görə, Lightning Network sayəsində kriptovalyutalar qarşıdakı illərdə müsbət istiqamətdə dəyişəcək və alış-verişdə istifadəsi artacaq. Konsepsiya Bitcoin-in üzləşdiyi çətinliklər nəzərə alınaraq hazırlansa da, Lightning Network-dən bütün kriptovalyutalar faydalana bilər.