Bitcoin şəbəkəsindəki bəzi kripto pulqabıları istifadəçilərə tranzaksiya haqqını özlərinin təyin etməsinə imkan verir. BTC-ni heç bir haqq ödəmədən göndərmək mümkündür, lakin böyük ehtimalla mayninqçilər belə tranzaksiyaları nəzərə almayacaq və onlar heç vaxt təsdiqlənməyəcək.
Bəzilərinin düşündüyünün əksinə, Bitcoin haqları göndərilən məbləğə görə deyil, tranzaksiyanın ölçüsünə (bit ilə) görə müəyyən olunur. Məsələn, tutaq ki, tranzaksiyanızın ölçüsü 400 bitdir və orta tranzaksiya haqqı hazırda hər bit üçün 80 satoshidir. Bu halda tranzaksiyanızın növbəti bloka düşmək şansının yüksək olması üçün təxminən 32.000 satoshi (yəni 0,00032 BTC) ödəməli olacaqsınız.
Şəbəkədə yüklənmə artdıqda və BTC göndərmək tələbatı yüksəldikdə, sürətli təsdiq üçün ödənilməli olan haqlar da artır, çünki digər bitcoin istifadəçiləri də eyni şeyi etməyə çalışır. Bazarda volatilliyin yüksək olduğu dövrlərdə bu vəziyyətlə qarşılaşmaq mümkündür.
Buna görə də yüksək tranzaksiya haqları BTC-ni gündəlik ödənişlərdə istifadə etməyi çətinləşdirə bilər. 3 dollarlıq bir fincan qəhvə almaq üçün bu məbləğdən qat-qat yüksək haqq ödəmək məntiqli olmazdı.
1 MB limiti (blok ölçüsü) olan bir bloka yalnız müəyyən sayda tranzaksiya daxil edilə bilər. Mayninqçilər bu blokları blokçeynə mümkün qədər tez əlavə edir, lakin bu sürətin də bir həddi var.
Kriptovalyuta şəbəkələrinin miqyaslana bilməsi şəbəkə haqlarının müəyyənləşməsində böyük əhəmiyyət daşıyır. Blokçeyn tərtibatçıları bu problemi həll etmək üçün fasiləsiz çalışır. SegWit və Lightning Network kimi şəbəkə yeniləmələrinin tətbiqi miqyaslanmanı xeyli yaxşılaşdırdı.