Kripto valyuta ekosistemində mühüm ad olan və Binance-in baş direktoru kimi tanınan Changpeng Zhao kimdir, kriptolar üçün niyə bu qədər önəmlidir?
Kripto valyuta ekosistemində çoxlu mühüm və məşhur ad var. Bu yazı silsiləsində hər həftə kripto ekosistemində yer alan və kriptovalyutalar üçün əhəmiyyət qazanan adları araşdırırıq.
Əvvəllər kriptovalyutalar üçün önəm qazanan adlar hansılar idi, niyə önəmli oldular, kriptodan başqa nə ilə maraqlanırlar? Bu yazıda kriptovalyuta ilə maraqlanan hər kəsin artıq tanıdığı bir adla bağlı suala cavab veririk: "Binance-in baş direktoru Changpeng Zhao kimdir?"
Changpeng Zhao kimdir?
Kripto ekosistemində CZ kimi tanıdığımız Changpeng Zhao çinli-kanadalı iş adamıdır. O, 1977-ci ildə Çinin Jiangsu əyalətində doğulub. Məlumdur ki, professor olan atası burjua təmayüllü ziyalı sayılmış və CZ doğulduqdan qısa müddət sonra müvəqqəti olaraq sürgün edilmişdi.
Sonralar, 1980-ci illərin sonunda Zhao ailəsi ilə birlikdə Kanadanın Britaniya Kolumbiyası əyalətindəki Vankuver şəhərinə köçdü. Atası sürgün ediləndən sonra CZ McDonald's və yanacaqdoldurma məntəqəsi də daxil olmaqla müxtəlif işlərdə çalışaraq ailəsini dolandırdı.
Daha sonra Zhao təhsilini Kanadanın Monreal şəhərindəki McGill Universitetində davam etdirdi və kompüter elmləri üzrə ixtisaslaşdı. Universitetdən sonra Tokio Fond Birjasında işləməyə başladı və ticarət sifarişlərinin uyğunlaşdırılması üçün proqram təminatı hazırladı. CZ həmçinin Bloomberg Tradebook-da fyuçers proqramlarının tərtibatçısı kimi çalışıb.
2005-ci ildə Şanxaya köçən Zhao brokerlər üçün ən sürətli yüksək tezlikli ticarət sistemləri kimi qiymətləndirilən Fusion Systems şirkətini qurdu.
Proqram təminatı sahəsində özünü inkişaf etdirdikdən sonra Zhao kripto ekosisteminə daxil oldu: 2013-cü ildən etibarən Blockchain.info da daxil olmaqla müxtəlif kripto layihələrində işlədi və OKCoin-in baş texnologiya direktoru vəzifəsini tutdu.
Changpeng Zhao və kriptovalyutalar
Yuxarıda qeyd etdiyimiz kimi, CZ 2013-cü ildən bəri kripto ekosistemi ilə yaşayır. Lakin Changpeng Zhao-nun tanınması və populyarlığı ticarət həcminə görə bu gün dünyanın ən böyük kriptovalyuta birjası olan Binance-i qurduğu andan sürətlə artmağa başladı.
2017-ci ildə Zhao Binance adlı kriptovalyuta birjasını qurmaq üçün OKCoin-dən ayrıldı. ICO zamanı 15 milyon dollar vəsait topladıqdan sonra 2017-ci ilin iyulunda Binance-i təsis etdi. Səkkiz aydan da az müddətdə Zhao Binance-i 2018-ci ilin aprelinə olan məlumata görə ticarət həcminə görə dünyanın ən böyük kriptovalyuta birjasına çevirdi.
2018-ci ilin fevralında Forbes jurnalı Zhao-nu "The Richest People in the Cryptocurrency Space" siyahısında üçüncü yerə yerləşdirdi. Bundan əlavə, CZ Forbes-in "Crypto Rich List 2021" siyahısında 5-ci oldu. 2021-ci il üçün CZ-nin xalis sərvəti təxminən 1,9 milyard dollar olaraq qiymətləndirilir.
Bu gün kripto ekosistemi ilə maraqlanan bir çox insanın tanıdığı CZ Twitter hesabından fəal istifadə edir və həm kriptovalyutalar, həm də şirkəti Binance haqqında daim paylaşımlar edir. CZ-nin ixtisas sahələri nəzərə alınarsa, demək olar ki, bütün kripto ekosisteminin ona hörmət etdiyini və tövsiyələrini nəzərə aldığını söyləmək mümkündür.